感恩呀改編所有聖經故事都完全免費,不用給原作者邀付任何版權費。不像電影圈那邊的操作,若把小說改編成電影的話,未開拍就需先支付大筆版權費給出版社。
經過上次的聖經迷你話劇創作項目之後,承蒙老闆兼監製的賞識,我老婆呢再邀請我,把主日學查經用的另一段經文,改編成另一齣迷你話劇。
本劇改編自列王紀下4章8至37節
劇中角色有:貴老爺、貴夫人、小二哥、以利沙、僕人基哈西(又名基仔)、旁白、主角耶和華
第一幕
準備出場角色:貴老爺、貴夫人、小二哥、以利沙、基仔
背景:在書念大客棧,午飯時間,客人不多。
貴老爺與貴夫人正在客棧吃飯。
貴夫人幫老爺斟茶,說:老爺,飲啖茶先啦。係陳年普洱茶嚟咖。
貴老爺說:好呀,唔該夫人。夫人呀,你想食乜嘢點心呢?不如等我幫你嗌啦。
貴夫人說:嗯,簡簡單單得啦,隨便嗌啲蝦餃啦灌湯餃啦魚翅餃啦包魚燒賣啦龍蝦伊麵啦…唔好太多嘞,兩個人食差唔多咖啦…
(貴老爺邊聽邊顯得驚訝)
貴老爺說:小二哥,請過過嚟,幫我地寫啲點心…
(貴老爺與小二哥逐漸變靜音)
與此同時,以利沙與僕人基哈西剛巧途經書念大客棧。
以利沙對僕人說:基仔呀,我地都行咗一朝嘞,我有啲肚餓,前面有間客棧,不如我地去嗰度坐低休息吓食啲嘢先啦。
基仔說:係,主人。
(基仔在貴老爺旁面的那張檯,殷勤招呼以利沙坐下來。)
小二哥走過來,殷勤地說:兩位客官,想食啲咩嘢呢?
以利沙說:小二哥,我地要一壺清水,兩碗白飯,呀!加一碟青豆添,唔該晒。
(小二哥對他們二人使白眼)心想:你兩個窮鬼真丟架,一壺清水,兩碗白飯?
貴夫人留意到以利沙二人的舉動,並靜悄悄對貴老爺說:老爺老爺,你睇吓,隔離檯嗰位客人炯炯有神,氣質非凡,我睇佢就係我地以色列中嘅嗰位神人喇!(以利沙碌大雙眼,炯炯有神樣)
(驚訝樣) 貴老爺說:嗄!神人?
貴夫人說:老爺老爺,我地身為神嘅子民,點可以虧待神嘅僕人呀?不如我地… (神秘樣) (兩人定格)
旁白:經上記著說:書念那裏有一個大戶的婦人強留他吃飯。此後,以利沙每從那裏經過就進去吃飯。
第一幕完
第二幕
準備功夫及出場角色:人扮雞啼聲,以利沙,僕人基哈西(基仔),貴夫人,人扮嬰兒哭聲
(有幾下雞啼聲,以利沙睡醒起床,打開窗口。) 以利沙望向樓下對僕人說:基仔呀,你去幫我請貴夫人過嚟,我有說話要同佢講。
基仔說:係,主人。
貴夫人進場,站在一旁。(基仔站在中間,作以利沙與貴夫人之間的傳話人)
以利沙對基仔說:你同貴夫人講:我見到你好有心,為咗我依個神嘅僕人出錢出力,花咗好多心思去接待我哋。咁我可以為你做啲咩呢?嗯,我可以向我哋嘅王為你求啲咩呢?
基仔轉身對貴夫人說同一番話(作默劇狀)。
貴夫人對基仔說:多謝神人。接待神嘅僕人係應該嘅,既然我已經住喺我哋自己嘅百姓當中,有食有住又有錢,夠嘞夠嘞。唔洗喇,多謝晒神人。
基仔轉身對以利沙說同一番話(作默劇狀)。
以利沙說:基仔呀,你話吖,我究竟可以為貴夫人做啲咩呢?
基仔撓撓頭,苦思一陣,突然大叫:有啦,主人,我諗到喇…(以利沙被嚇一跳)
基仔在以利沙耳旁說悄悄話 (作默劇狀)。 (以利沙顯得好滿意)
旁白:經上記著說:婦人果然懷孕,到了那時候,生了一個兒子,正如以利沙所說的。
(背景音樂有人扮嬰兒哭聲)
第二幕完
第三幕
準備出場角色:貴夫人、旁白、貴老爺、僕人(阿四)
(貴夫人抱住貴B (毛公仔),望住死去的貴B顯得好傷心,隔幾秒之後定格)
(旁白故意清清喉嚨咳兩聲) 說:經上記著說:孩子漸漸長大。有一日,佢跑到田裡去搵佢父親。孩子(佢叫貴B)一邊噤住個額頭一邊嗌:「爸爸,爸爸,我嗰頭好痛啊,我嗰頭好痛啊!」父親對僕人(佢叫阿四) 講:「阿四阿四,快啲抱貴B去搵佢阿媽…
(貴夫人突然醒神,走到鏡頭前) 好有信心地說:老爺,你叫阿四快啲去幫我預備一隻驢仔過嚟,我要去見以利沙大人,我知道以色列嘅神人一定可以救返我地嘅貴B嘅…
第三幕完
第四幕
準備出場角色:貴夫人,以利沙,僕人基哈西(基仔)
以利沙坐在椅子上。(貴夫人抱住以利沙的腳) 對以利沙說:以利沙大人,求吓你我求吓你,救吓我地嘅貴B啦…
(基仔前去輕輕推開貴夫人) 對貴夫人說:夫人,你放手先啦。
貴夫人堅決地說:我唔放。
基仔接著說:你放啦。
貴夫人接著說:我唔放。
基仔接著說:你放啦。
貴夫人接著說:我唔放。
基仔說:你放啦…(他們二人拉扯之際,以利沙雙手推開他們二人) 不耐煩地說:好嘞好嘞,你地兩個再咁樣拉拉扯扯落去,我條褲都就嚟俾你地扯甩喇!
(貴夫人與基仔馬上不好意思地縮手退開)
以利沙說:貴夫人,請你馬上帶我去見你嗰寶貝仔。(以利沙邊說邊走向右方)
貴夫人說:大人,依邊先啱呀! 大人。 (以利沙扮作若無其事地馬上轉方向走)
旁白(匆匆走出來故意撞一撞以利沙) 說:經上記著說:以利沙便祈禱耶和華,伏在孩子身上,口對口,眼對眼,手對手,口對口,眼對眼,手對手,孩子的身體就漸漸暖和了…(以利沙跟住旁白所說的做一連串動作)
結局:以利沙坐在椅子上嘆住茶輕鬆地說:基仔,你去幫我叫貴夫人來。
貴夫人進場。以利沙說:貴夫人,你仲唔快啲去抱起你個寶貝仔。
(貴夫人歡歡喜喜,走過去抱起貴B又攬又錫,一邊按住貴B的頭不斷向以利沙鞠躬,一邊說:多謝大人,多謝大人,多謝大人。)
全劇完
後記:考慮到最後一幕戲中有點頗埋身的動作戲,若以我們這班正值青春期男女授受不親的小學雞演員來演的話,效果可能未如理想。於是乎我逛長島時經過某間二手店,用了10元買這個公仔道具來飾演我們的貴B。所以呢,這名副其實是小本經營囉。